| Y.1059 |
Prull .i. aidbliugud mor ⁊ metugad, ut dixit ingen hui Dulsaine in bainlethcerd fri Senchan Torpeist i mManainn col. 73 .i. immomloiscet mo de n-o prull. friscart iarom int eigess di muinthir Senchain .i. in cerd mac hui Dulsaine o Liac do Tursaige Thull. is de tra roboi .i. do Senchan inni sin. docorustair fair techt a Manaind .i. fecht n-ainius do chor cuarto indi. caoga egess a llin cenmothæ ecsine. is ing ma rodmbaei didiu riam im nach oile eces samail in cumduigh robæi irn Senchan cenmotha a tughan suadh ⁊ rl. an romba dech do timtagaib flatha fer nGaoidel, is ed bertatur ind eis chena impu. intan tra documlaiset for fairgi ⁊ docorustar a lui no urland fri tir, adagladastar gillae ecuisc anindustae ina ndiaid den tir nomleicid-si lib, ol se. doecet uile in gillae. ni bu data leo iarom a lecud cucae, ar ba fæ leo nip n-en comadus ina n-eill, ar ba dochraid a ecuscc. intan cetamas dobered nech a mer for a etan, notheged a thaosc di gur bren for a dib culadaib, a chongrus crace do tar a mullach co maothan a da imdæd. ata la nech asitchid batar caib a inchinde romebdatar tria coicend. cuirritir ogh luin a di suil. luaithitir fiamain, duibidir éc, buidithir ór rind a fiaclae, glaisitir bun cuiluld a mbun. da lurgain lomchaola. da ṡeirith birdae brecanba foe. dia talta de in cheirt bui uime, ni bu decmaing techt di for imirgi a haonar, mana fuirmithe cloch fuirre, ar imat a mil. doriucart o guth mor fri Senchan col. 74 ⁊ ISbert fris bem torbach-sa duit-si oldas ind ne no ind re no in de forfuallach forbaoth fil immut. in setir lat, ol Senchan, tuidecht iarsin lui isin curach. promfit, ol se. cingthe iarom iarsin luidh isin curach, luaithidir lochaid iar forgarmain, co mbai isin curach. ba suaill tra co rroibdithe in curach cona lucht arindi rombrogsat roime-sium insindara leth in lestair ⁊ in leth n-aill do-sum, ⁊ atbertatare amail bid a haongiun dotrorbai peist, a Senchain, bid si do muinnter uile acht connernam no connerlam docum tire. IS de sin tra robai do-sum Senchan Torpeist .i. Senchan dororba pest no paist. recait iarom i Manaind. fonacbat a coblach i tir. a mbadar didiu oc imtecht iarsin traigh, go facatar in tsentuinne moingleith moir iarsin carraic, ut poeta dixit sentuinde ocus senbachlach, rop ses rophuis .i. scuap adnacail a crinfeis, acht nochanfognat Mac De is ni thabrat a primleis .i. a primite. Amlaid bui in caillech for in traigh, ag buain na femnuige ⁊ in marthoraid olchena. airegdai grata a cossa ⁊ a llamha, acht natmbui etach maith n-impe, ⁊ bái anfeith gorta fuirre ⁊ ba liach son immorro, ar ba sisi in bainleccerd ingin Ui Dulsaine di Muscraige Liach Tuill a cricu Ua Fidgenti. dochuaid idhe didiu for cuairt Eirenn ⁊ Alban ⁊ Mannand ⁊ ba marb a muinter uile. bai iarom a bratair mac ui Dulsaine, cerd amra sidhe, dano ac a hiarmoracht fo crich Eirean ⁊ nis-fuair, ⁊ reliqua. atan didiu atconnairc in tsentsinde col. 75 inna heicsiu imuscomarcatair cibtar he. math i re immidcomairc Senchan eges Erend uile ind so. inatbie do humalldoid, a Senchain, ol si, anad frim aithessc-sa. rombia em, ol Senchan. nibsa eolaig imnig odbaigh ciasa femmain bolgaigh bung, cati a lethchomarc. sochtaid Senchan iarom ⁊ ind ecis uile dano. doling iarom in gilldæ remeperta ar beulu Senchain ⁊ asbert sta, a caillech. na acaille Senchan. ni comadas dit. atomglaidesa amne, ol nitacelladbar nach aile don muintir-si. Cid didiu, ol in bainnlethcerd, caiti a lethrand. ni ansa, or se de muin cairge mare Manann doronad mor saland sund. is fir, or si, ⁊ in lethrand hisiu dano .i. imommloiscet mo da n-o prull, caiti a lethrann, a Senchain, beos. amein, ol in gillæ, oc saigid dit acallma Senchain, nit-acelladar em. ceist didiu, cati lat-sa, ol si. ni ansa, ol se in cerd mac ui Dulsaine o Liic do Tursaige Thull. fir son, or Senchan, in tusa ingen Ui Dulsaine, in bainlicerd oc atatbar cuingidh sechnon Erenn. is me em, or si. fothraicer iarom la Senchan di. dobret dechelt n-amra uimpi ⁊ tainic la Senchán docum nEirenn. intan tra tangatar docum Erend conacatar in gillæ remepertae, ar ba hoclach ruithentae righae rornor roiscletan mormileta eseom, co muing órbuidhe órṡnaith fathmaindigh, caisidir carra menucrot, tlacht rochaom rigdae uimbe, milech orduide a n-imdunad in tlachta sin. sciath corcra col. 76 cobradach cetharochair, lan do gemaib carrmogail ⁊ liag logmar ⁊ nemthand ⁊ cristal ⁊ sathfire for a clíu. cloidhemh coilgdirech co tairchetlaib oir deirg for a deiscib, cathbarr airgidhe co coroín orduighe im a cend. dealb is airechdam ⁊ is aidbli luchracht bui for daine riamh fair. teid iarsin deisil Senchain cona muinyir, et nusquam aparuit ex illo tempore. dubium itaque non est quod ille Poematis erat spiritus.
|
| 1059 | col. 72 | concord. |